L’Assemblee di Comunitât Linguistiche Furlane (ACLiF) e à mandât fûr une gnove iniziative digjitâl par valorizâ e promovi la marilenghe e la culture dal Friûl. Sul sît www.aclif.it, sul canâl YouTube Aclif Cultura e sui siei spazis socials e à publicât une rie di videos dal titul “Prin Plan”, fats ducj in lenghe furlane dal Grup Comunicazion Lenghe Furlane – fat di Claudia Brugnetta, Daniele Crosara, Jonathan Feruglio e Eros Marcuz – che cumò a son a disposizion di ducj.
I filmâts a son un inmagant viaç a la scuvierte dal teritori furlan, dai siei borcs carateristics, da lis ariis naturalistichis e dai personaçs che indi àn fate la storie. Traviers imagjins trativis e narazions che a cjapin dentri, i videos a permetin di calâsi dal dut dentri da la culture e da lis tradizions da la regjon. Dome par fâ cualchi esempi: se a Cjasarse claramentri si fevele da la figure di Pier Paolo Pasolini, a Zui spazi a l’arie archeologjiche. E se a Cjavaç si fevele da lis ativitâts sportivis sul lât, a Sante Marize di Vildivar ve là saltâ fûr Elio Bartolini e vie indenant. In dut a son 28 i videos zirâts in ancjetantis localitâts furlanis.
“Cun cheste iniziative o volìn tirâ dongje simpri plui int a la lenghe furlane e fâ cognossi lis ricjecis culturâls dal nestri teritori – al à dit Daniele Sergon, president da l’ACLiF e sindic di Caprive -. I videos a son un imprest eficaç e diret par promovi la nestre identitât e par fâ di maniere che il furlan al continui a jessi vîf, fevelât e passât a lis gnovis gjenerazions. Vêju metûts a disposizion su lis principâls plateformis web al judarà a spandi chescj prodots audiovisîfs pardabon ben fats: une vere conte a plui vôs su lis ecelencis dal Friûl. Chest progjet al jere za stât mandât in onde sui canâi Rai, e chest par ricuardâ la nestre salde volontât di une plui grande presince dal furlan inta la tv di Stât: al è ancjemò spazi par incressi lis oris di programazion par furlan cul budget di cumò, magari par un telegjornâl curt in marilenghe, come che za timp o domandìn ducj insiemi tant che Comuns di fevele furlane”.L’ACLiF, ch’e met adun 148 Comuns dal Friûl Vignesie Julie e dal Venit, dulà ch’e je une comunitât di fevele furlane, si impegne inta la tutele e inta la valorizazion da la lenghe furlane. Cun cheste gnove iniziative, l’Assemblee e conferme il so rûl jenfri i sogjets di riferiment par la promozion da la culture furlane a nivel regjonâl e nazionâl.
