Il Friûl al à un avignî se i zovins si ricognossin inte sô partignince e non àn pôre di deventâ protagoniscj: cun chest intindiment la matine di joibe ai 11 di Dicembar li dal Auditorium comunâl di Pucûi si fasarà la cuarte “Zornade dai Conseis Comunâi dai Fruts dal Friûl” puartade indenant de Assemblee de Comunitât Linguistiche Furlane – ACLiF.
Cheste realtât – che e tire dongje 150 Comuns di lenghe furlane dal Friûl Vignesie Julie e dal Venit orientâl – fin di cuant che e je nassude 10 agns indaûr e viôt di tutelâ e promovi la identitât culturâl e linguistiche furlane, ancje traviers il rapuart cun lis scuelis e i ents che a viodin dai zovins, massime i Conseis Comunâi dai Fruts (CCF).
Intai agns passâts la Zornade anuâl e je stade fate intal 2022 a Flumisel La Vile, 2023 a Udin, 2024 a Codroip e Glemone.
“Chest progjet – al conte il president di ACLiF Daniele Sergon, sindic di Caprive – al à chê di meti adun i rapresentants dai Conseis Comunâi dai Fruts par meti a confront lis lôr esperiencis cjalant al incressi gjenerâl di cheste istituzion. I components dai Conseis, difat, in considerazion dal lôr rûl, a àn un incaric di interès public, che si pues meti a confront cun chel dai coleghis adults che a sentin intai Conseis comunâi “dai grancj”. Su lôr la Assemblee de Comunitât Linguistiche Furlane e à decidût di fâ un invistiment, pal avignî dal nestri teritori”.
Vie pe matine i rapresentants dai CCF a varàn la ocasion di fâ doi laboratoris: un curât di Marco Anzovino sul argoment dal impegn e des sieltis che i fruts a son clamâts a frontâ; chel altri curât dal Teatri Stabil Furlan su la maniere di stâ in relazion cul public.