150 COMUNS DI LENGHE FURLANE
TIRÂTS DONGJE A UDIN IN PALAÇ BELGRADO
Timp di assemblee gjenerâl pe ACLiF, Assemblee de Comunitât Linguistiche Furlane: miercui ai 19 di Novembar a lis 6 di dopodimisdì in Palaç Belgrado a Udin i Comuns di lenghe furlane di Friûl Vignesie Julie e Venit orientâl si tiraran dongje par fâ un belanç di chest 2025 che al va a finî e che al à viodût la Assemblee tocjâ doi impuartants obietîfs.
“Difat – al à dit il president Daniele Sergon, sindic di Caprive – o tirarìn un belanç dai nestris prins 10 agns di ativitât, dal moment che ACLiF e je nassude intal 2015. Un deceni dulà che e je cressude dai 55 Comuns di imprin fin ai 150 di cumò, cu la gnove rivade Sante Marie La Lungje, che e sarà celebrade inte assemblee a Udin. O ricuardìn simpri cun braure che la nestre Assemblee e nas dal bas, parcè che no je nissune imposizion ma a son i Comuns a decidi un par un la adesion. Tirantsi dongje o darìn ancjemò une volte il segnâl di un Friûl compat cun dut che a son diferencis teritoriâls, che a son e a costituissin la ricjece stesse dal Friûl, e che a àn dutis avuâl dignitât dentri de ACLiF. Une unitât di intindiments ancje intai impegns che o sin daûr a puartâ indenant, a tacâ di chel di vê un tg e un gjr in marilenghe intai canâi de Rai: al sarà un dai argoments che o fevelarìn in assemblee”.
L’ordin dal dì de riunion al viodarà la aprovazion dai verbâi de ultime assemblee gjenerâl, la ratifiche des ultimis adesions, il belanç consuntîf 2024 e la presentazion des ativitâts 2025, e altri se a ind è.