E je ancje la poie da l’Assemblee di Comunitât Linguistiche Furlane (ACLiF) a la IV Conference di verifiche e propueste su la lenghe furlane che, come decidût da la gabine di regjìe tirade sot dal president dal Consei regjonâl Mauro Bordin, si fasarà a Gurize intal Març dal 2025, intal periodi che la citât adun cun Nova Gorica e sarà capitâl europeane da la culture.
Ben si sa che la leç regjonâl 29/2007 (Normis pe tutele, valorizazion e promozion de lenghe furlane) e domande che almancul une volte ogni 5 agns e sedi tirade sot une Conference par fâ il pont su l’atuazion da la leç stesse. L’ultime e je stade fate a Udin tal Novembar dal 2021.
“O acetìn cun plasê ancje nô – al conte il president da l’Assemblee Daniele Sergon, sindic di Caprive – l’invît dal president Bordin par chescj “stâts gjenerâi” intune citât tant che Gurize da l’anime furlane, dal pont che ca e je nassude la Societât Filologjiche. E propit il Comun di Gurize al è un dai nestris 148 socis. Come Comuns di marilenghe, o puartarìn intai lavôrs lis nestris esperiencis e propuestis, su la fonde da la nestre esperience direte intai rapuarts cui citadins. La capitâl europeane da la culture e sarà ancje l’ocasion par cjatâsi cui rapresentants di chês altris lenghis minoritariis dal continent”.