FURLAN, SLOVEN E TODESC PAR UNE RÊT COMUN DI PROMOZION E TUTELE. DUT PAR RINFUARCÎ ANCJE L’AUTONOMIE REGJONÂL
Al è nassût il Pat di Spilimberc jenfri lis rapresentancis da lis lenchjis minoritariis dal Friûl Vignesie Julie (urlan, sloven e todesc), dal non dal borc che al à ospitât la cunvigne “Une tiere 4 lenghis – passât presint avignî dal plurilinguisim in Friûl Vignesie Julie” la sere dai 17 di Zenâr, Zornade nazionâl da lis lenghis locâls e a un cuart di secul da la promulgazion da la leç nazionâl 482/99 di tutele da lis minorancis linguistichis.
I lavôrs – promovûts di ACLiF (Assemblee Comunitât Linguistiche Furlane, 150 Comuns di lenghe furlane aderents cun dentri ancje Spilimberc) e Istitût Ladin Furlan Pre Checo Placerean – a àn viodût par la prime volte ducj ator da la stesse taule parsore da lis organizazions furlanis ancje lis trê plui grandis rapresentancis associativis slovenis (SKGZ – SSO e ZSKP) e la gnove ACLiT (Assemblee Comunitât Linguistiche Todescje). Sale consiliâr dal municipi plene, cun tancj aministradôrs locâi di dut il Friûl Vignesie Julie. La cuarte lenghe nomenade inta la cunvigne e je il talian, doprât par lenghe francje di dutis trê lis components.
“Un moment storic – al à dit il sindic di Caprive Daniele Sergon, president da la ACLiF – dulà che o ai mandât fûr la propueste, condividude di chei altris esponents da lis nestris lenghis locâls, di inviâ une rêt simpri plui sinergjiche tra nô. Un vêr pat jenfri lis nestris lenghis, che o sin stâts contents di podê inviâ come un mosaic a Spilimberc, citât da la art musive, pal avignî da la nestre Regjon, che e à di pontâ simpri di plui sul plurilinguisim par tutelâ la autonomie aministrative e politiche. Cheste varietât linguistiche e je il nestri avignî, no dome il nestri passât: ancje parcè che, numars in man, metint adun ducj chei che a fevelin une lenghe locâl in Friûl Vignesie Julie, si capìs facil che no je une minorance, ma une largje maiorance da la popolazion. E la atualitât di chest argoment e je stade dimostrade ancje dal grant interès che la cunvigne e à stiçât, cu la sale plene di tancj sindics e aministradôrs dal Friûl Vignesie Julie, cun ancje i rapresentants dai Comuns di Udin e Gurize”.
Su la taule, tant che obietîf sul lunc, chel di rivâ a fâ meti dentri intal Statût da la Regjon Autonome Friûl Vignesie Julie la tutele dal plurilinguisim.
Il stes sindic di Spilimberc Enrico Sarcinelli al à pandût la sperance che il Tiliment, che si viôt da la sale consiliâr, al puedi jessi simpri di plui il flum che al unìs e no che al divît il teritori regjonâl. Presinte ancje l’assessore a la culture dal Comun di Spilimberc Ester Filipuzzi, componente ancje dal diretîf ACLiF.
Par la Regjon il salût dal conseîr Markus Maurmair, za president da la stesse ACLiF, che al à ancje lui evidenziât il valôr da lis lenghis locâls par l’autonomie. Intervents ancje di Geremia Gomboso president dal Istitût Ladin Furlan Pre Checo Placerean, di Eros Cisilino president da la ARLeF che al à fevelât da la voie di furlan inta lis fameis che lu domandin pai lôr fîs a scuele, e di Federico Vicario president da la Societât Filologjiche Furlane che al à presentât denant trat la stampe dai ats da la cunvigne “Rai pal Friûl”, batint su la domande da la furlanìe di plui oris di lenghe furlane inta la Tv di Stât cun ancje un telegjornâl dedicât.
Velia Plozner e à rapresentât la minorance todescje da la ACLiT, che jê e je la presidente, invezit par la minorance slovene presints i trê presidents Ksenija Dobrila (Union culturâl economiche slovene SKGZ), Walter Bandelj (Confederazion da lis Organizazions slovenis SSO) e Miloš Čotar (Union culturâl catoliche slovene ZSKP). Intai lôr intervents a àn evidenziât ce che a fasin e ce che a volaressin realizâ par la tutele da la lôr lenghe, mostrant di volê vierzisi a une plui largje colaborazion ce la rapresentance furlane.
In chest sens al è di model il câs dai ladins dal Trentin Sud Tirôl che in gracie da la colaborazion cun la minorance di lenghe todescje a àn vudis diviersis formis di tutele e ancje une sede Rai dedicade a lôr, cun dut che a àn un numar tant plui piçul di citadins, vincj voltis di mancul rispiet a chei furlans. Ospit speciâl par contâ chê realtât il procuradôr dal Comun gjenerâl dai ladins di Fasse Giuseppe Detomas.