CJALANT AL 2026
E je stade fate la assemblee gjenerâl di ACLiF – Assemblee de Comunitât Linguistiche Furlane. Miercui ai 19 di Novembar in Palaç Belgrado a Udin i Comuns di lenghe furlane di Friûl Vignesie Julie e Venit orientâl si son tirâts dongje par fâ un belanç di chest 2025 che al va a finî e che al à viodût la Assemblee riviâ a doi impuartants risultâts: i 10 agns di ativitât e cuote 150 dai Comuns aderents (cu la ultime adesion, in ordin di timp, di Sante Marie La Lungje). I lavôrs a son stâts vierts cuntun minût di cidinôr in ricuart dai muarts di Breçan a Cormons inte ultime bugade di brut timp.
“Dîs agns – al à dit il president Daniele Sergon, sindic di Caprive – dulà che la nestre realtât e je cressude dai 55 Comuns dal inizi fin ai 150 di cumò, cu la gnove jentrade Sante Marie La Lungje che i è stât dât acet ca a Udin. O ricuardìn simpri cun braure che la nestre Assemblee e nas dal bas, stant che no je nissune imposizion ma a son i Comuns ugnui a decidi pe adesion. Cul tirâsi dongje o vin dât ancjemò une volte il segnâl di un Friûl compat cun dut che a son diferencis teritoriâls, che a son a son e tal stes timp a son la ricjece dal Friûl, e che a àn dutis la stesse dignitât dentre de ACLiF. Ancjemò une volte o vin evidenziât che il multilinguisim, che inte nestre piçule regjon al viôt spale cun spale furlan, sloven, todesc e talian, al è la clâf pe conferme de nestre autonomie regjonâl cumò e par l’avignî. Une unitât di intindiments ancje intai impegns che o sin daûr a puartâ indenant tant che Comuns dui lenghe furlane, e dut chest cjalant al 2026, an che o inovarìn lis incarghis dal nestri diretîf”.
Da lis domandis, chê di vê un tgj e un gjr in lenghe furlane sui canâi Rai (“no dome un moment di informazion, ma ancje un moment di condivision di bande des fameis che lu viodaressin insiemi” al à dit Sergon), ma ancje une come anche il preseament par chês realtâts privadis che za lu garantissin (par esempli Telefriuli cul tgj Gnovis in bgracie di une sinergjie cun ACLiF stesse). De assemblee al ven ancje un gnûf impegn par iniziativis leadis ai zovins (di ricuardâ che ai 11 di Dicembar si fasarà un gnûf apontament cu la zornade regjonâl dai Conseis Comunâi dai Fruts) ancje traviers il dialic cu lis scuelis (di Sergon e ven la propueste di proponi il furlan ancje in spazis extrascolastics tant che lis mensis e i doposcuele) e lis fameis, la colaborazion cun chês altris realtâts istituzionâls che a lavorin pe tutele dal furlan, a scomençâ di ARLeF – che a so non al à fevelât il president Eros Cisilino, confermant l’impegn a lavorâ adun – e Societât Filologjiche Furlane.
Jenfri chei altris impegns dai ultins mês, Sergon al à ricuardât chel pal messâl in marilenghe, pe restituzion de cartelonistiche par furlan te stazion dai trens di Cividât, il jutori ae Associazion Sportive Furlane in prevision de manifestazion di balon “Europeada 2028”. Il president de associazion sportive Daniele Puntel al à presentât une prossime manifestazion di corse di fâ intai dîs de Fieste de Patrie dal Friûl.
Il diretîf di ACLiF, parsore dal president Sergon, al è fat dal vicepresident Franco D’Altilia sindic di Palaçûl, Gabriele Bressan sindic di Puçui, Monica Feragotto conseire comunâl a Glemone, Ornella Comuzzo assessore a Tavagnà, Alessandra Vanone assessore a Tresesin e Ester Filipuzzi assessore a Spilimberc. Cun lôr il segretari Claudio Romanzin.
Inta spazi des discussions finâls, la conseire comunâl di Udin delegade ae identitât furlane e al multilinguisim Stefania Garlatti-Costa a à proponût une plateforme in linie, dulà condividi lis buinis pratichis di ogni Comun in materie di politichis linguistichis a pro dal furlan. Serena Gani conseire comunâl a Cjamin dal Tiliment e à fevelât sul insegnament de lenghe furlane tes scuelis mediis. L’assessôr al decentrament di Gurize Maurizio Negro, ricuardant ce che al è stât fat dentri de suaze de Capitâl europeane de culture, al à tornât a butâ la propueste di stampâ la Costituzion taliane in 4 lenghis (furlan, sloven, todesc e talian).