IL DIRETÎF AL MET JÙ IL PROGRAM DI ATIVITÂT 2025
L’ACLiF (Assemblee de Comunitât Linguistiche Furlane) e rive uficialmentri a cuote 150 Comuns aderents: e je stade fate vinars la cerimonie di consegne de fasse tricolôr cul simbul da l’Assemblee a Fabio Pettenà, sindic di Sante Marie La Lungje. A consegnâle il sindic di Caprive Daniele Sergon, president da l’ACLiF, ch’al à tirât dongje in palaç Mauroner a Tissan il diretîf da l’Assemblee par presentâ il program dal 2025. Presints ancje aministradôrs di altris Comuns de zone bielzà socis di ACLiF, tant che la vicesindiche di Pavie Elena Fabbro e l’assessôr di Manzan Lorenzo Alessio, parsore di une rapresentance dal consei comunâl di cjase e des associazions locâls.
“Si respirave un aiar pardabon positîf – al à dit Sergon – dulà che o vin podût tocjâ cun man l’entusiasim dai amîs di Sante Marie La Lungje di deventâ part de nestre Assemblee di Comunitât. Graziis al sindic Pettenà pal calorôs acet. Pardabon preseade ancje la presince di chei altris aministradôrs dai Comuns dongje, a testemoniâ che il nestri al è simpri un lavôr di scuadre ch’al met adun realtâts vicinis e lontanis”.
Come che ben si sa, l’ACLiF al met dongje Comuns di lenghe furlane indulà che storicamentri si fevele la marilenghe intes regjons Friûl Vignesie Julie e Venit (mandament di Puart). In chest an 2025, paraltri, e fâs 10 agns de sô istituzion.
“La riunion dal diretîf – al à zontât il president Sergon – e je stade tant che une “pidade di vie” par lis diviersis ativitâts che o vin in program chest an: dal impegn par vê plui lenghe furlane in Rai a la continuazion dal percors di valorizazion dal lavôr dai Conseis Comunâi dai Fruts, fin a lis iniziativis di poie al program di Go!2025 Nova Gorica e Gurize capitâl europeane de culture. Liniis programatichis che o larìn a concretizâ tirant dentri ducj i 150 nestris Comuns aderents”.