A 50 AGNS DA LA MUART
Ancje l’Assemblee di Comunitât Linguistiche Furlane (ACLiF, cun 141 Comuns aderents) e à ricuardât la figure dal ministri e senatôr Tiziano Tessitori, “pari” da la Regjon, 50 agns dopo la sô muart. Partecipant a la cunvigne organizade inta la sô Sedean e laudant l’organizazion a cure dal Istitût Ladin Furlan “Pre Checo Placerean” e dal Comun, il president da l’ACLIF Daniele Sergon, sindic di Caprive, al à fat une riflession su l’ereditât storiche da l’opare di Tessitori e l’avignî da l’autonomie dal Friûl Vignesie Julie.
“Vuê saressino bogns di fâ ce che Tessitori al à fat pal nestri Friûl? Tessitori al è stât la persone politiche fuarte, ferme e buine di fâ l’interès dal Friûl in sede parlamentâr a Rome. Grande figure di stature politiche e salde convinzion autonomiste furlane, cualitâts ch’a àn permetût di fâ nassi la Regjon Friûl Vignesie Julie. Chest – daûr la mê opinion – al à di fânus capî che in dì di vuê e covente une politiche autonomiste di guvier par podê fâ contâ di plui il Friûl. E par difindi la specialitât dal Friûl, in chê volte vuadagnade traviers di cheste azion politiche di rilievance, in dì di vuê e je dome une strade: la tutele da lis cuatri lenghis feveladis in chest piçul façolet di tiere. Puartìn in Europe e intal mont il nestri messaç di pâs: ca, dopo secui, talians, furlans, slovens e todescs a son vivin in armonie. Un presint che ancje Tessitori al à contribuît a fâ nassi e che al sta a nô coltivâ in avignî”.