Al sostituis MarKus Maurmair. Plui furlan te RAI, promozion de lenghe tai Conseis Comunȃi dai zovins e cuarte mace fûr dai Comuns tra i obietîfs de Assemblee dai Comuns furlanofons.
Daniele Sergon, sindic di Caprive al è il gnûf president de ACLiF, la Assemblee de Comunitȃt Linguistiche Furlane, l’organisim de aministrazion publiche che e zonte i Comuns furlanofons de Regjon. Sergon, za stȃt component dal Consei diretîf de Assemblee, al sucêt a Markus Maurmair che al lasse la cjarie dopo de so elezion a conseîr regjonȃl, stant che la fin de legjislature e à rindût vacantis lis cjariis di president e vicepresident.
Cun Sergon tal rûl di vicepresident al è stȃt elet Claudio Violino, rapresentant dal Comun di Merêt di Tombe. Il rinovament dai sorestants ACLiF al è avignût vie par la assemblee eletive dal organisim che e si è tignude a Palaç Belgrȃt a Udin ai 6 di Jugn. Inte assemblee e je stade ancje pandude la nomine in curt a component dal Consei Diretîf di Ester Filipuzzi, assessore comunȃl di Spilimberc.
Sergon tal so intervent al à marcȃt che la so nomine e rapresente une continuitȃt politiche rispiet a la presidence di prime in te suaze de promozion de lenghe e culture furlanis. Il gnûf president al à ricuardȃt i impegns che a vignaran confermȃts: la bataie par il furlan in Rai che e à bielzà vût cualchi risultȃt, ma che e je ancjemò lontane da l’obietîf finȃl di une presince come chê de minorance slovene in te programazion locȃl; il slargjament de partecipazion dai Comuns ae Assemblee (fin cumò a son 138); la dibisugne di evitâ il fruçonament jenfri lis svariadis componentis de patrie furlane; l’impegn a la promozion de lenghe tai Consei comunȃi dai zovins.
Maurmair al à ringraziȃt par la disponibilitȃt Sergon e Violino marcant che, in graciis ancje dal impegn de ACLiF in te Convenzion tra Rai e Regjon pe prime volte al è stȃt metût un milion di euro par programs radiofonics e televisîfs in lenghe furlane; al à nomenȃt ancje il progjet de cuarte mace fûr dai Comuns par tignî simpri picjade la bandiere furlane dongje di chês europeane, taliane e de Regjon Friûl Vignesie Julie.
Il conseîr regjonȃl Diego Bernardis al à puartȃt i salûts dal Assessôr a lis Autonomiis Locȃls de Regjon Pierpaolo Roberti pandint la intenzion di rinfuarcî il supuart economic (cumò di 70.000 euros) e tecnic aministratîf che la Regjon e furnìs a la ACLiF.
In tai intervents che a an sierȃt la Assemblee, Alessandro Pian, vicesindic di Cjopris Viscon al à domandȃt che la ACLiF e cjapedi posizion tai confronts di une tindince pandude in ambit aministratîf e culturȃl che e smicje a eliminȃ il riferiment al Friûl tal teritori gurizan imponint la denominazion “Vignesie Julie”, fie daI redentisim par identificâ ents e struturis. Maurizio Negro, Assessôr a lis Identitȃts Linguistichis e al Decentrament dal Comun di Gurize al à domandȃt un impegn par tutelȃ la tradizion dal mai, tipiche dal teritori gurizan, di meti dongje a altris tradizions, par esempli i pignarûi epifanics.
Daspò de fin de assemblee i rapresentants de ACLiF a son lȃts in Catedrȃl a Udin par partecipâ ae Messe par memoreȃ il Beȃt Bertrant di Saint Geniès, un dai personaçs simbul de identitȃt furlane, in tal cjadalan de sô muart. Ae celebrazion e je seguide la rapresentazion dal drame di Novella Cantarutti “Bertrant cinc spadis”.