DIRETÎF ACLIF A CIVIDÂT PAR FESTEZÂ L’ADESION

by | Otu 17, 2024

SERGON: “UN ONÔR VÊ CUN NÔ LA CAPITÂL LANGOBARDE”

PRESINTS ANCJE MANZAN E TOREAN

Si à tirât sot nossere [miercui ai 16] a Cividât il diretîf da l’Assemblee di Comunitât Linguistiche Furlane (ACLiF), l’organisim ch’al rapresente i comuns di lenghe furlane: nassût intal 2015, al à in dì di vuê cuasi 150 socis, in pratiche plui dal 80% di dutis lis comunitâts di marilenghe di Udin, Pordenon, Gurize e dal Venit orientâl. 

La sielte di cjatâsi inta la citât ducât e je dade da la volontât di festezâ la sô resinte adesion, delibarade dal consei comunâl inta la riunion dai 28 di Jugn passât. Al incuintri a jerin la sindiche Daniela Bernardi, il prin citadin di Manzan Piero Furlani e il vicesindic di Torean Giuliano Lesa, in rapresentance dal teritori. Par ACLiF a jerin il president Daniele Sergon di Caprive, il vice Claudio Violino di Merêt di Tombe, la conseìre Ester Filipuzzi di Spilimberc e il president onorari Diego Navarria di Cjarlins.

Sergon al inizi al à ringraziât la sindiche Bernardi par la sielte fate da l’aministrazion comunâl e al à metût in evidence che e je propit cheste la fuarce da l’Assemblee Linguistiche: «ACLiF e nas dal bas, no cuntun at imponût, ma cul vôt dai conseis comunâi, paraltri cuasi simpri in maniere unanime, metint adun fuarcis di maiorance e di minorance. Nestri compit al è di puartâ indenant il teme da la nestre identitât culturâl e linguistiche». Il diretîf ACLiF al à pandût la sodisfazion di cjoli dentri Cividât, come ancje Manzan e Torean, ancje pal grant valôr simbolic ch’e rapresente, dal moment ch’e je stade capitâl dal ducât langobart dal Friûl e par secui ancje sede patriarcjâl.

Bernardi e à pandût la sô sodisfazion par l’incuintri e e à marcât lis tantis iniziativis leadis a la culture furlane che si fasin a Cividât, fasint un ricuart ancje da la figure dal sindic e senadôr Guglielmo Pelizzo, grant furlanist, che par passe dîs agns al è stât president da la Societât Filologjiche Furlane, cjapant il puest di Tiziano Tessitori, il pari da la Regjon.

Lesa, fevelant di Torean, al à ricuardât la presince insiemi di dôs animis intal teritori, chê furlane e chê slave, ch’a a son une grande ricjece sociâl e culturâl. 

Ancje Furlani (Manzan) al à marcât il strent leam da la lenghe e da la culture e al à manifestât la sperance che «une plui grande cognossince da la storie e da la culture dal Friûl a podedin rinfuarcî l’identitât da la nestre tiere».