E PASSE AI CUARTS DI FINÂL DAI CAMPIONÂTS EUROPEANS PAR LIS MINORANCIS
LA LAUDE DA L’ACLIF CUL PRESIDENT SERGON
Sedis goi fats, dome sîs cjapâts, par trê vitoriis claris e la cualificazion ai cuarts di finâl come prime dal so ziron: e je daûr a maraveâ ducj la Selezion masculine dal Friûl al torneu Europeade, campionât european di balon dedicât a lis minorancis storichis che si davuelç inte regjon transfrontaliere dal Schleswig, a cjaval di Danimarche e Gjermanie. I fantats dai alenadôrs Lizzi e Trangoni a àn superât prin i cusins dai Slovens di Italie intal derby regjonâl par 4-2, po dopo i Ongjarês di Romanie par 4-1 e di ultin i Todescs di Ongjarìe par 8-3.
Propit vuê di matine (3 di Lui) e je stade fate l’estrazion pai cuarts: i aversaris de fase a eliminazion direte a saran i zuiadôrs de Alte Slesie (ancje lôr passâts a plens ponts intal lôr ziron). La partide si zuiarà doman a lis 5 dal dopomisdì. L’Alte Slesie e je une regjon di minorance todescje in Polonie
Intant e rive la laude de Assemblee di Comunitât Linguistiche Furlane (ACLiF) ch’e met adun 148 Comuns dulà che si fevele la lenghe furlane.
“Compliments e un grant sburt pe continuazion dal torneu – al à dit il president de Assemblee Daniele Sergon, sindic di Caprive -: i furlans a son cun voaltris par tignî alt i nestris colôrs. Un torneu che nol è dome un grant moment sportîf ma ancje une ocasion di cognossisi un cul altri e di confrontâsi dentri des minorancis d’Europe, che dispès a àn ce fâ cun problematichis di tutele compagnis. Il sport al è un veicul impuartant di promozion e ancje nô come Assemblee lu metarìn simpri di plui intes nestris ativitâts. Intal timp, un grant Fuarce Friûl par dâur ancjemò plui anim ai nestris fantats!”.