Daspò dal rimant par sîs mês il president Maurmair al clame adun assemblee urgjente
Udin, ai 13 di Mai – “Ancjemò une volte a paiâ a son i citadins dal Friûl Vignesie Julie, in particolâr chei che a fevelin il furlan e che pûr paiant l’abonament Rai no viodin sodisfats dirits basilârs ricognossûts de Costituzion e des leçs dal Stât: a chest pont no podìn che apelânus aes istituzions plui altis che nus rapresentin. O clamarìn une assemblee urgjente par definî gnovis azions par fâ sintî la nestre vôs dal Friûl fin a Rome”.
Lu declare il president de Assemblee de Comunitât linguistiche furlane, Markus Maurmair, dopo de notizie dal rinovament par altris sîs mês de convenzion tra Guvier e Rai pe trasmission di programs radiofonics e televisîfs in lenghe furlane.Esprimint “delusion profonde” a pet dal rimant, Maurmair al domande di capî lis resons che a àn puartât a chest fat che al à deludût lis domandis che a vignivin des istituzions e de comunitât par otignî plui presince dal furlan tal servizi public.
“E je une decision che e lasse l’amâr in bocje, a front dal impegn di tantis fuarcis politichis e culturâls. Ma no podevin nancje iludisi di vinci daurman. Cheste no je la fin dal nestri progjet, ma dome – al anunzie Murmair – il principi di une bataie che nus impegnarà intal futûr. I alpins nus àn insegnât un sproc fondamentâl: mai molâ. ACLiF, a non di ducj i 132 sindics che o rapresentìn, a continuarà a lotâ in ogni cjamp pe dignitât de lenghe furlane”.
“O sin a cognossince des esperiencis di chês altris regjons cun minorancis linguistichis e de atenzion particolâr che e ven dade de bande de Rai e dal Stât – al conclût Maurmair – e o pretindìn che il furlan nol vegni discriminât cun nivei di tutele che no son pâr a chei di altris lenghis minoritariis”.