Prime di sierâ classis e scuelis sintedin ancje lis comunitâts e i Comuns de int che e fevele par furlan
Par colpe che a nassin simpri mancul fruts, ancje lis scuelis a fasin i conts cu la mancjance di ‘clients’ e cussì, daûr lis regulis dadis dal guvier statâl, lis classis cun mancul di 15 students a van metudis adun (cul probleme però che, se a deventin plui di 20 fruts, si gjave spazi ae didatiche) e lis scuelis cun mancul iscrits a àn di jessi sieradis o leadis a chês altris. Une disgracie pal Friûl, parcè che tancj paîs, no dome de mont ma ancje dal plan, a riscjin di pierdi la lôr scuele, obleant i fruts a lâ intun altri comun.
A proponi une soluzion divierse al pense Daniele Sergon, president de Assemblee de Comunitât Linguistiche Furlane, grup ricognossût cun leç regjonâl, che e ten dongje fin cumò 139 Comuns.
“Prime di sierâ classis e scuelis – al dîs Sergon, che al è ancje sindic di Caprive – o speri che si sintedin ancje lis comunitâts e i Comuns, vierzint une taule par fevelâ e cjatâ une soluzion che e sedi leade ancje ae presince de int che e fevele par furlan”.
Dut câs une soluzion e podarès rivâ propit de leç che e difint lis lenghis di chenti (la 482 dal 1999) e che e comande su chê altre che e dete lis regulis par taiâ classis e scuelis in Italie (la 81 dal 2009). Ven a stâi, come che te mont e su lis isulis a si pues ancje lâ sot dai limits, cussì al è permetût di fâ intai paîs dulà che e vîf une comunitât linguistiche di minorance, come i furlans, i slovens e i todescs. Ta chel câs achì il minim par ogni classe si sbasse a 10 arlêfs.
“E sarès la soluzion plui juste intune Regjon autonome come la nestre – al va indenant Sergon –. Purtrop tai ultins agns, come che al pant ancje un sondaç, i dirits des minorancis linguistichis no son ricognossûts e no vegnin tignûts di cont cuant che a son di cjapâ decisions come chestis. Se lis direzions des scuelis a doprassin chê regule achì, a podaressin vê mancul fastidis di taiâ classis e sierâ scuelis. E cun di plui a podaressin puartâ indenant lezions che a permetin di dâ plui atenzions ai fruts plui debii e a chei forescj vignûts in Friûl di pôc”.
Sergon, a non di dute le Assemblee, al domande un incuintri al diretôr dal Ufici scolastic regjonâl.
“O sin pronts a jessi al flanc de zonte regjonâl – al siere Sergon – parcè che cheste Regjon e pues restâ autonome cuntun sô Statût speciâl, dome se e difint lis sôs minorancis linguistichis, ancje inte scuele. No vin di dismenteâ che cence di lôr ancje la Regjon e riscje di no sei plui ricognossude speciâl dal Stât. Cussì sustignìn simpri la zonte regjonâl su chê strade cul nestri contribût e cu lis nestri propuestis”.