I Sindics de Comunitât linguistiche furlane, rivade al primât di 138 adesions, si son dâts dongje in Assemblee. L’apel: “Tutele e promozion de marilenghe a judin a tignî viertis lis classis des scuelis tai paîs”. Tal 2022 la azion de Aclif e sarà orientade ae informazion, ae formazion dal personâl dai municipis e ai Conseis Comunâi dai Fruts
Assemblee plene ai 12 di Avrîl a Palaç Belgrât pe Comunitât Linguistiche Furlane (ACLIF), l’ent che al rapresente i Comuns furlanofons. Une realtât in cressite, che cu lis ultimis adesions (Cjasteons di Strade, Gonars, Pagnà, Reane, Fane e Claut) e je rivade a 138 aministrazions comunâls sociis par pandi la volontât di tutelâ la identitât furlane tes lôr comunitâts.
Presints l’assessôr regjonâl Pierpaolo Roberti, il president dal consei regjonâl Piero Mauro Zanin e il president de Arlef Eros Cisilino, che ducj a àn ricognossût il rûl atîf e propositîf dal organisim, la Assemblee e à viodût il so president Markus Maurmair marcâ il belanç di une ativitât tal 2021 e à burît fûr une schirie di iniziativis par slargjâ l’ûs de marilenghe te informazion e te publiche aministrazion. De campagne “Plui furlan te Rai” al progjet di un telegjornâl par furlan (Gnovis) su Telefriuli, de colaborazion cun plusoris realtâts istituzionâls, editoriâls e associativis fintremai ae cunvigne inmaneade a Vile Russiz sul implei dal furlan e des altris lenghis minoritariis te publiche aministrazion, tantis a sono stadis lis ativitâts puartadis indevant vie pal an. La visibilitât de Assemblee e je cressude e in chest gnûf esercizi l’ent al à za tacât a meti in vore lis gnovis azions che a marcaran il so plan di lavôr pal 2022, par mostrâ che promozion e tutele di lenghe e identitât a puartin oportunitâts concretis a pro des nestris comunitâts.
In cheste direzion al va l’apel che Maurmair al à indreçât dîs indaûr ai sindics par fâ cressi la sensibilitât dai dirigjents scolastics a doprâ lis normis che a ufrissin ai Istitûts scolastics dai teritoris dai Comuns furlanofons la possibilitât di derogâ ai numars minims di arlêfs iscrits pe formazion des classis: “un esempli concret – al à dit il president – di cemût che l’esercizi de tutele de marilenghe al po judâ a difindi i organics des scuelis e salacor i stes ples scolastics. L’atenzion che cualchi Comun dal Venit al à riservade a cheste possibilitât e je un clâr segnâl de bisugne di frontâ un teme cussì impuartant come tignî vierts i istitûts scolastics intes piçulis comunitâts. E se la tutele de lenghe mari e jude a superâ la rigjide aplicazion di tets numerics stabilîts su la cjarte in maniere vuarbe rispiet ae specificitât dai teritoris, al paie la spese doprâ fin insom dutis lis normis di leç”.
Lis gjenerazions plui zovinis a son al centri dal program Aclif 2022 ancje pe azion di stimul che si vûl dâ aes aministrazion pe formazion dai Conseis Comunâi dai Fruts, come forme di educazion ae partecipazion ative dai citadins che a vignaran. I CCF, là che a vegnin metûts in vore, a son une farie di citadinance e al è probabil che a produsin fantats che doman si cjamaran il pês de lôr comunitât in vieste di volontaris, membris di associazions e salacor aministradôrs. Tes intenzions de ACLIF, come che e à spiegât la assessore di Tavagnà Ornella Comuzzo, e je la volontât di meti in pîts une zornade di confront dai CCR sui temis de identitât, cuntun sproc laboratoriâl, par tacâ un percors di condivision a partî des istituzions che a rapresentin i plui zovins citadins.
Altre iniziative particolâr e je stade la distribuzion a ducj i sindics des fassis tricolôr cul simbul de Aclif: un mût concret e evident di meti adun il rûl istituzionâl inte suaze dal Stât talian cu la rapresentance identitarie di une comunitât che e à la braùre di considerâsi furlane. E che e larà indevant a sustignî la necessitât di une presince fuarte dal furlan inte informazion de Rai e in dut il panorame informatîf regjonâl, dant continuitât ai partenariâts zà in vore e disvilupant ancje altris colaborazions, se al sarà pussibil. Cundiplui, cu la colaborazion cul Cirf (Centri Interdipartimentâl di Ricercje su la culture Furlane) de Universitât di Udin, si metarà in pîts un cors di formazion pai dipendents des aministrazions publichis.
La discussion e à ancje viert un interessant dibatit rispiet ae necessitât di individuâ lis datis pe predisposizion di un regolament che al ledi a dissiplinâ la esposizion de bandiere dal Friûl. Se ai 3 di Avrîl (nassite de Patrie dal Friûl tal 1077) la bandiere e svintule za, a son ancje altris ricorencis leadis ae identitât furlane che a podaressin jessi memoreadis su lis macis di ducj i nestris municipis: dai 27 di Fevrâr (la “crudêl joibe grasse”), ai 6 di Mai (sisme dal 1976), ai 6 di Jugn (sassini dal Beât Bertrant tal 1350), ai 7 di Jugn (fin dal Stât patriarcâl tal 1420), ai 12 di Lui (Sants Ermacore e Fortunât, patrons de Regjon) e ai 9 di Otubar (disastri dal Vajont, 1963). Ancje se – al à osservât il sindic di Udin Pietro Fontanini – nuie al viete la esposizion de bandiere furlane a pâr di chê taliane, di chê regjonâl e di chê europeane, la ACLIF e lavorarà par scrivi un regolament di mandâ ai Comuns par impegnâ lis aministrazions a previodi di metile fûr in chestis ocasions significativis pe storie de identitât furlane.