DOPO L’ADESION DI PINÇAN. DUCJ I COMUNS DA LA RIVE DRETE DAL TILIMENT INTAL FRIÛL OCIDENTÂL CUMÒ A ’NT FASIN PART
Il consei comunâl di Pinçan al à decidût a largje maiorance di aderî a l’Assemblee di Comunitât Linguistiche Furlane (ACLiF), l’organisim ch’al met adun lis comunitâts dulà ch’e je fevelade e ricognossude la lenghe furlane. Un passaç impuartant no dome parcè che al è il 149esin Comun a jentrâ, ma ancje parcè che cu la jentrade di Pinçan si complete il numar da lis adesions su la rive drete dal Tiliment intal Friûl Ocidentâl. Difat cumò, di Vît fin jù a San Michêl (passant juste apont par Pinçan, Spilimberc, San Zorç da la Richinvelde, San Martin, Voleson Darzin, Cjasarse, San vît dal Tiliment e Morsan da lis Ocjis) ducj i comuns da la rive a son dentri da l’Assemblee.
Il sindic di Pinçan Emiliano De Biasio al fâs cussì il so prin pas, adun cun chei altris coleghis furlans, il prossim 7 di Novembar a Udin, inta l’assemblee gjenerâl da l’ACLiF, dulà che dentri e sarà fate la ratifiche.
Une vore sodisfat il president da l’ACLiF Daniele Sergon, sindic di Caprive: “Mi plâs – al evidenzia Sergon – ricuardâ simpri che fâ part da l’ACLiF e je une libare sielte dai Comuns, une decision ch’e nas e ch’e cres dal bas. La jentrade di Pinçan e je impuartante ancje intal discors da la tutele e promozion da la marilenghe intal Friûl Ocidentâl: vê ariis omogjeniis par adesion a l’ACLiF, come che cumò al capite pai Comuns da la rive destre dal Tiliment, al è un element positîf in plui par inviâ colaborazions. O tiarìn dentri Pinçan intai nestris progjets: cunvignis, cors di formazion pai ents locâi, scambis di esperiencis cun chês altris minorancis linguistichis d’Italie, campagne par incressi i programs radiotelevisîfs ch’a rivuardin il Friûl e vie indenant”.
Nassude intal 2015 par volontât di un cincuante Comuns “pionîrs”, ACLiF e je cressude une vore a la svelte intai agns: i Comuns a jerin za deventâts 114 intal 2017, 138 intal 2021 e cumò juste apont si à rivâts a cuote 149. E cjape dentri Comune da lis trê vecjis provinciis di Udin, Pordenon e Gurize, ma ancje cualchidun dal teritori di Puart, storicamentri part dal Friûl ,a cumò sot da la citât metropolitane di Vignesie, dulà che ancjemò in dì di vuê si fevele par furlan.