149 COMUNS DI FEVELE FURLANE PAR LA TUTELE DA LA LENGHE. SLARGJÂT IL DIRETÎF E ELET GNÛF VICEPRESIDENT
Un aministradôr (assessôr o conseîr comunâl) delegât al multilinguisim e ai rapuarts cu l’Assemblee da la Comunitât Linguistiche Furlane in ognidun dai Comuns di fevele furlane in Friûl e Venit orientâl: l’Assemblee da la Comunitât Linguistiche Furlane – prossime a finî 10 agns intal 2025 e cressude dai 55 iniziâi fin al numar atuâl di 149 Comuns aderents – e à tornât a lançâ cun cheste propueset la sô azion di tutele e promozion da l’identitât culturâl e linguistiche furlane intai lavôrs assembleârs che a son stât joibe a Palaç Belgrado a Udin.
No dome: inta la riunion, direte di Daniele Sergon, sindic di Caprive, i Comuns a àn decidût a l’unanimitât di slargjâ il diretîf e votâ il gnûf vicepresident. Al è Franco D’Altilia, sindic di Palaçûl, ch’al à cjapât il testemoni di Claudio Violino, za sindic di Merêt di Tombe, che i àn tributât un vivarôs ringraziament pal lavôr fat in chescj agns. Adun cun D’Altilia a son jentrâts intal diretîf ancje Gabriele Bressan sindic di Poçui e Monica Feragotto conseìre comunâl a Glemone. Si zontin a Ornella Comuzzo (assessore a Tavagnà), Alessandra Vanone (assessore a Tresesin) e Ester Filipuzzi (assessore a Spilimberc), che a son stadis confermadis.
“Un diretîf slargjât – al à dit il president Daniele Sergon – par fontâ cun ancjemò plui energjìe i impegns che nus spietin intal an dal decenâl. O ricuardìn simpri cun braure che la nestre Assemblee e nas dal bas, dal moment che no je nissune imposizion ma a son i Comuns ognidun par so cont a decidi l’adesion. INta l’assemblee o vin sintût l’unitâ di un Friûl compat pur cu lis sôs diferencis teritoriâls, che a esistin e a son la ricjece stesse dal Friûl, e ch’a àn dutis la stesse dignitât dentri da l’ACLiF. E ancjemò une volte o vin metût in evidence che il multilinguisim, che inta la nestre piçule regjon e viôt un dongje di chel altri furlan, sloven, todesc e talian, e je la clâf par la conferme da la nestre autonomie regjonâl cumò e par l’avignî. Di ca o tornìn a partî cun ancjemò plui snait, in bande da la Regjon autonome Friûl Vignesie Julie e di chês altris istituzions dal mont furlan”.
Inta l’assemblee al è stât aprovât il belanç 2024 e a son stâts sclarîts i obietîfs pal 2025, tant che un gnûf impegn par iniziativis leadis ai zovin ancje traviers il dialic cu lis scuelis, la colaborazion cun chês altris realtâts istituzionâls ch’a lavorin par la tutele dal furlan a scomençâ di ARLeF e Societât Filologjiche Furlane, l’impegn par vê plui lenghe furlane in Rai e il grant apontament di Go2025 Nova Gorica Gurize Capitâl europeane da la culture. Cun di plui al è stât pandût che il lavôr di traduzion da lis gnovis che ogni dì a van a formâ il telegjornâl par furlan Gnovis di Telefriuli, al judarà a “educâ” in marilenghe la gnove inteligjence artificiâl di Google, in gracie di un acuardi cun ARLeF.
I lavôrs si son vierts cul salût dal assessôr a la culture di Udin Federico Angelo Pirone. Presint ancje il vecjo president ACLiF Diego Navarria e i rapresentants di cualchidun dai Comuns ch’a àn aderît di pôc a l’Assemblee, tant che Cjamin dal Tiliment, Cividât, Manzan, Torean e Pinçan. Intervents in assemblee ancje di Fabrizio Mattiussi (sindic di Rivignan Teôr), di Serena Gani (Cjamin dal Tiliment) e Maurizio Negro (Gurize).
“Une grande emozion jessi elet vicepresident” al à dit Franco D’Altilia, che intal so discors par furlan al à ricuardât che di zovin, lui origjinari da la Pulie, al à imparât cun braure cheste lenghe cuant ch’al jere rivât ancjemò zovenut in Friûl. “E – al à zontât – graziis al president, al diretîf e a l’assemble che mi àn dade fiducie. Lis scuelis a saran fondamentâls par sensibilizâ simpri di plui lis gnovis gjenerazions a doprâ la lenghe furlane”.