Il sindic di Voleson Darzin confermât president da l’Assemblee dai Comuns di lenghe furlane. Intal diretîf al ven dentri ancje Martignà. A l’Assemblee presinte ancje la Regjon cun Roberti e Zanin
L’Assemblee da la Comunitât Linguistiche Furlane, tirade dongje a Udin in Palaç Belgrado, e à confermât par president il sindic di Voleson Darzin Markus Maurmair. A decidi a son stâts i rapresetnants dai 138 Comuns aderents. Intun cun Maurmair, confermât cuasi dal dut ancje il Diretîf, fat di Daniele Sergon (sindic di Caprive), Ornella Comuzzo (assessòre di Tavagnà) e Alessandra Vanone (assessore di Tresesin). Al lasse invezit il so puest di vicepresident Alessandro Marangoni (sindic di Dartigne e president da la Comunitât di Mont dal Glemonês): a sostituîlu al è stât sielt Gianluca Casali, sindic di Martignà.
Un ricognossiment da la validitât da la gjestion dal trieni 2019-2022, caraterizât da la capacitât di tirâ sot adesions: dai 86 socis fondadôrs dal 2015 al è stât dut un incressi fin ai 138 dal dì di vuê. E in assemblee il president al à fat savê ch’a son rivâts une vore indenant i contats par l’adesion dal Comun di Pordenon, un risultât ch’al fasarès l’Assemblee ancjemò plui rapresentative di dute la comunitât furlane.
A l’Assemblee a son intervignûts in rapresentance da la Regjon ancje il president dal Consei Pier Mauro Zanin e l’assessôr Pierpaolo Roberti, che ducj i doi a àn evidenziât cetant ch’a àn incidût lis azions da l’Assemblee di Comunitât Linguistiche a supuart da la lenghe furlane e dal so ûs inta la publiche comunicazion (massime di bande da la Rai) e da la publiche aministrazion. La pression da l’ACLiF in sinergjie cun chês altris istituzions, come ch’al à ricuardât ancje il president da l’ARLeF Eros Cisilino, e à permetût di fâ cressi in maniere consistente i bêçs stanziâts par la programazion radio e tv dedicade al furlan inta la convenzion pal serviz public radiotelevisîf passant di 200mil a un milion di euros.
Maurmair al è tornât a bati su la volontât di un confront cu lis realtâts di altris Regjons a statût speciâl dulà che aministrazion e lenghis si judin l’une cu l’altre (Val d’Aoste e Trentin-Sud Tirôl par prins). Un esempli su ducj al è la costituzion da la liste regjonâl dai segretaris comunâi, che par lôr e varès di jessi previodude ancje une cognossince specifiche di une da lis lenghis minoritariis; ma e je massime une atuazion concrete da l’autonomie regjonâl, tant che altris realtâts come la Val d’Aoste di passe 25 agns a àn za metût in vore ce che ur jere risiervât da lis leçs speciâls. E continuarà ancje l’opare di pression su lis istituzions scolastichis, par ch’a sedin rispietadis e metudis in vore lis normis previodudis inta lis ariis a minorance linguistiche (in chest câs il furlan), ch’a permetin di sbassâ fin a 10 il numar minim dai arlêfs ch’a coventin par la formazion da lis classis, cuintri i 15 previodûts di regole a nivel talian. Chest al permetarès di tignî vierts putrops ples destinâts se no a sierâ; ma cheste deroghe dispès no ven nancje domandade dai istitûts scolastics.
Inta la riunion si à fevelât ancje da lis iniziativis a vignî, massime chês ch’a cjapin dentri i Conseis comunâi dai fruts, par stiçâ i aministradôrs di doman a cognossi di plui la lôr tiere; e la colocazion di une cuarte mace in ducj i municipis par dâi dignitât a la bandiere furlane, ch’e varès di jessi simpri metude fûr come chêss altris bielzà presintis dal Stât, da l’Union Europeane e da la Regjon.
Di ultin, dopo l’elezion par aclamazion, Maurmair al à cjapât la peraule metint in evidence che jenfri i compits futûrs da l’Assemblee di Comunitât Linguistiche Furlane al sarà l’assum a rivendicâ (dentri da la riforme istituzionâl di stamp presidenziâl che il prossim Guvier al volarès fâ) cuintripês adats par valorizâ l’autonomie, che in plui da la devoluzion di competencis dal Stât viers lis Regjons a previodin ancje un ricognossiment di rapresentance dentri dal Parlament da lis minorancis linguistichis, come che za al sucêt par lis realtâts todescjis e slovenis.