E va a rielezion l’Assemblee dai Comuns furlans, cressude di 20 unitâta tai ultins 3 agnsBelanç cetant positîf no cate la pandemie. Rai, scuela e P.A. al cûr da l’azion
Moment une vore impuartant par l’ACLiF, l’Assemblee de Comunitât Linguistiche Furlane, che martars ai 4 di Otubar a lis 5 e mieze sot sere a Udin in Palaç Belgrado e metarà adun i rapresentants dai 138 Comuns aderents par il rinovament da lis carghis pai prossins 3 agns.
Il prin pont al ordin dal dì al sarà propit la relazion di fin mandât dal president Markus Maurmair (sindic di Voleson Darzin), ch’al presentarà ai components da l’ACLiF il belanç da l’ativitât di chest Consei Diretîf, elet intal 2019 e fat di Alessandro Marangoni (sindic di Dartigne), Daniele Sergon (sindic di Caprive), Ornella Comuzzo (assessòre di Tavagnà) e Alessandra Vanone (assessòre di Tresesin). No cate la pandemie, l’organisim – nassût cu la leç sui ents locâi dal 2014 – al à metût in vore une ativitât dal sigûr corpose, ch’e à puartât ancje a l’adesion di un numar simpri plui alt di aministrazions. Se i municipis aderents a jerin sul imprin 118, in chescj 3 agns la platee si à slargjât di 20, metint lis fondis par un altri slargjament ancjemò.
Inta l’azion da l’Assemblee a son stadis une vore incisivis lis azions a jutori da la lenghe furlane e dal so ûs ta la comunicazion, sedi publiche che privade. Jenfri i risultâts otignûts (in sinergjie cun chei altris organisims regjonâi) l’aument da lis oris di trasmission dedicadis al Friûl di bande da la Rai e l’inviament dal tg in marilenghe “Gnovis” su l’emitent Telefriuli.
Par ce ch’al riguarde l’ûs da la lenghe minotirarie inta la publiche aministrazion si à stabilît un confront cu lis realtâts di chês altris Regjons a statût speciâl su lis buinis azions dulà che aministrazion e lenghis si judin l’une cu l’altre. Cun Val d’Aoste e Trentin Sud-Tirôl il gap di superâ al è ancjemò grant. Dal rest par la salveguardie da l’autonomie lis lenghis di minorance ch’a son in regjon a son essenziâls, a diviers nivei. Baste pensâ a la scuele e a la pussibilitât che lis normis di tutele da la lenghe furlane a dan di sbassâ il limit minim dal numar di arlêfs necessaris par la formazion di une classe. Chest al permet di tignî vierts ples intîrs ch’a saressin invezit destinâts a sierâ; ma cehste deroghe dispès no je stade nancje domandade da lis istituzions scolastichis. L’ACLiF al à rilevât che cheste norme no ven rispietade e e à sburtât par che cheste leç e sedi aplicade in maniere sistematiche.
Inta la riunion da l’Assemblee, dulà ch’al à za dit ch’al vegnarà l’assessôr regjonâl Pierpaolo Roberti, si fevelarà ancje da lis iniziativis a vignî, di chês ch’a cjaparan dentri i Conseis comunâi dai fruts – i aministradôrs di doman – a l’istituzion di une serie di ricorincis significativis pal Friûl. Par sielzilis si cirarâ une largje condivision cu l’istituzion di une comission a pueste.