Franco D’Altilia (Palaçûl) gnûf President, Fabio Pettenà (Sante Marie La Lungje) vice
Al sarà Franco D’Altilia, sindic di Palaçûl, a direzi pai prossims agns l’Assemblee de Comunitât Linguistiche Furlane (ACLiF), judât di Fabio Pettenà, prin citadin di Sante Marie La Lungje. E je la sentence dade fûr da l’assemblee dai sindics di lenghe furlane, che si à tirade dongje miercui di sere [27 di Mai] in palaç Belgrât a Udin, par decidi l’avignî dal organisim nassût tal 2015.
Il president di prin Daniele Sergon (Caprive), rivât a la fin dal so mandât, al veve za timp visât che nol intindeve tornâ a metisi, par dedicâ plui timp a la famee (di pocjis setemanis al è diventât pari di Vittoria). Il so intervent al è stât duncje une sorte di testament morâl, li che al à metût in evidence tant i risultâts che i aspiets critics. Dai risultâts, Sergon al à rivendicât prin di dut il sucès da la Zornade dai Conseis Comunâi dai fruts dal Friûl, nassude cuatri agns indaûr e che e cjape dentri ogni an un dusinte fantats dal Friûl, ma ancje il «continui lavôr di presince istituzionâl su lis bataiis plui impuartantis che a tocjin l’identitât furlane, tant che l’autonomie scolastiche, il telegjornâl par furlan in RAI, fintremai al messâl par furlan. A la fin dal so intervent, al à metût jù une riflession: «Si podevial fâ alc di miôr? Sì, ma si à ancje di ricognossi il lavôr fat e partî di chel par miorâ. Tal mont des minorancis linguistichis d’Italie il Friûl al è viodût un model di cjalâ, o vin di jessi braurôs di chest». Al à segnât chel che al varà di jessi un prossim obietîf: la rifondazion di ACLiF: «Si sin rindûts cont che o podìn lâ in dificoltât in maniere masse facile. O sin nassûts cun 50 Comuns, cumò o sin rivâts a 154; o vin di domandâsi se il nestri sisteme organizatîf al è ancjemò adat».
Dai intevents dai socis, in evidence l’invît dal assessôr Marcello Pitt di Çurçuvint a cjatâ fûr une maniere par tirâ dongje di plui i Comune da la Cjargne; invezit l’assessôr Maurizio Negro di Gurize al à batût su l’impuartance che lis diviersis minorancis linguistichis da la regjon (furlans, todescs e slovens) a lavorin adun, parcè che «di bessôi no si à nissun pês».
Grant interès pai Comuns dal mandament di Puart, presints cul sindic di Puart Luigi Toffolo, chel di Tei Oscar Cicuto, il president dal consei comunâl di San Michêl dal Tiliment Sergio Bornancin e l’assessôr di Fossalte Nicola Ongaretto. La lôr presince e je stade la testemoneance dal leam storic e culturâl di chel teritori cul Friûl (che int faseve part fin al 1805) e da la lôr volontât di tignîlu vîf cundut che a son intune regjon diferente.
Finide la discussion si è passâts al rinovament des incarghis, cu l’elezion a gnûf president di Franco D’Altilia, 64 agns, sindic di Palaçûl dal 2016 e za vice di Sergon in ACLiF intal ultin mandât. Lis sôs primis peraulis a son stadis par ringraciâ la scuadre dal diretîf che al à lavorât cun lôr in chescj agns, formade di Ornella Comuzzo (Tavagnà), Gabriele Bressan (Puçui), Alessandra Vanone (Tresesin), Ester Filipuzzi (Spilimberc) e Monica Feragotto (Glemone). Tal rûl di Vicepresident al è stât elet Fabio Pettenà, 46 agns, sindic di Sante Marie La Lungje dal 2019. Il lôr prin compit cumò al è di meti adun il gnûf consei diretîf e definî lis iniziativis dai prossims mês.
A l’assemblee dai sindics a jerin presints tant che ospits ancje il president da l’ARLeF Eros Cisilino, il diretôr da la Societât Filologjiche Feliciano Medeot e l’editôr da la Patrie dal Friûl Andrea Valcic.