FURLAN A SCUELE AL COVENTE UN IMPEGN PLUI’ CONCRET
Trê dîs di aprofondiment a Udin e Codroip par confrontâsi sui numars e proponi gnovis soluzions
Pal furlan a scuele al covente un impegn plui concret par che lis scuelis dal teritori di marilenghe a metin in vore la lôr autonomie, metint dentri la lenghe furlane a plen titul inta l’ufierte educative: cheste la “fotografie” che Mercator – Centri European di Ricercje sul Multilinguisim e l’Aprendiment des Lenghis cun sede in Frisie (Paîs Bas) – al à dât de dimension didattiche de marilenghe inte seconde edizion dal dossier dedicât al furlan, a 10 agns di distance de prime. I risultâts dal studi a saran al centri di trê dîs di ativitât che dai 11 ai 13 di Avrîl a viodaran adun Societât Filologjiche Furlane (SFF), Assemblee di Comunitât Linguistiche Furlane (ACLiF), Universitât dai Studis di Udin e altris realtâts di prin plan te promozion e difusion de lenghe furlane.
Il studi “La lenghe furlane tal sisteme educatîf talian” al è stât prontât di Ada Bier (Universitât dal Paîs Basc – UPV/EHU), Gabriele Zanello (Universitât dai Studis di Udin) e Antonella Ottogalli (Societât Filologjiche Furlane) su incaric dal Centri Mercator, invezit l’edizion par furlan e par talian e je stade publicade de Filologjiche. Chest studi al rapresente un dai risultâts dal progjet “FURLEUS”, finanziât dal program di ricercje e inovazion Horizon 2020 da l’Union Europeane mediant di une borse di ricercje Marie Skłodowska-Curie ospitade da l’Universitât dal Paîs Basc (UPV/EHU).
A distance di dîs agns da l’edizion precedente, il Dossier al fâs vignî fûr dut il ferment ch’al à menât a percors di formazion academiche specifics par insegnants di lenghe furlane, a cetantis publicazions fondadis su metodologjiis acreditadis par l’aprendiment des lenghis tant che il CLIL (Content and Language Integrated Learning), a vierzi un centri regjonâl di documentazion, ricercje e sperimentazion didatiche pe scuele furlane.
Rispiet a dîs agns indaûr (an scolastic 2013/2014) la percentuâl dai students ch’a àn sielt l’insegnament dal furlan intes scuelis da l’infanzie e primariis dal Friûl Vignesie Julie e je restade in sostance stabil fin al an scolastic 2022-2023.
Prin apontament cu la cunvigne academiche a Udin joibe ai 11 di Avrîl a lis 3 dal dopomisdì intal Auditorium Carlo Sgorlon dal Pôl de Formazion da l’Universitât di Udin in Vie Margreth 3.
Vinars ai 12 di Avrîl a lis 5 e mieze dal dopomisdì a Palaç Belgrado in Place Patriarcjât a Udin, l’incuintri al sarà viert ai rapresentants des istituzions e a dute la citadinance par inviâ adun un dibatit su la cuestion in colaborazion cun ARLeF e Regjon.
Par finî, sabide ai 13 di Avrîl li de Biblioteche civiche Pre Gilberto Pressacco di Codroip, des 9 di matine presentazion dentri de XI Zornade de Scuele furlane, event dedicât a insegnants.
“No platìn – al dîs Federico Vicario, president de Filologjiche – che a son tantis preocupazions sul insegnament dal furlan a scuele, cun putrops istitûts comprensîfs ch’a fasin fadie a garantîlu ai students. Chest cundut che di bande des fameis al è dutcâs interès par cheste ufierte didatiche. In particolâr lis dificoltâts a son plui di dut intes ex provinciis di Pordenon e Gurize, ma ancje in chê di Udin, pûr cun realtâts plui dinamichis, la situazion no je compagne di pardut. Traviers cheste seconde edizion dal Dossier dal Centri Mercator su la lenghe furlane, o volìn tornâ a vierzi il confront su cheste tematiche centrâl pe difusion dal furlan”.
“Cence dismenteâ dopo – al zonte Daniele Sergon, president ACLiF – che l’insegnament de lenghe furlane al è leât a strent cul argoment da l’autonomie scolastiche: difat i istitûts che le garantissin a puedin derogâ dai numars minims di students par ples e sezions. Un argoment di rude atualitât cjalant al acorpament di diviers istitûts comprensîfs sul teritori regjonâl che intes ariis furlanofonis a podaressin invezit contâ sun chest dirit. Int discutarìn cul mont des istituzions, par cjatâ fûr percors comuns di valorizazion”.
Ricevete questa email in quanto il vostro indirizzo fa parte della nostra mailing list per l’invio di comunicati stampa relativi ai nostri clienti. Adottiamo tutte le misure necessarie per garantire che i vostri dati siano al sicuro: in nessun caso vengono divulgati a terzi.
Dal 25 maggio 2018, entra in vigore il nuovo Regolamento Generale sulla Protezione dei Dati (GDPR – Regolamento UE 2016/679). Secondo le nuove disposizioni, saremo autorizzati a utilizzare i vostri dati personali soltanto previa vostra autorizzazione.
Se volete continuare a ricevere i comunicati, non fate nulla, autorizzandoci così a continuare a mandare le comunicazioni a questo indirizzo email.
Se invece preferite non ricevere più i nostri comunicati, richiedete la rimozione in qualsiasi momento scrivendo a questo nostro indirizzo e-mail.