Mercator – Centri European di Ricercje sul Multilinguisim e l’Aprendiment des Lenghis cun sede in Frisie (Paîs Bas) – al à prontât un dossier su la situazion dal furlan a scuele, che al sarà al centri di trê dîs di ativitât dai 11 ai 13 di Avrîl, che a viodaran adun Societât Filologjiche Furlane (SFF), Assemblee di Comunitât Linguistiche Furlane (ACLiF), Universitât dai Studis di Udin e altris realtâts di prin plan te promozion e difusion de lenghe furlane.
Prin apontament cu la cunvigne academiche a Udin joibe ai 11 di Avrîl a lis 3 dal dopomisdì intal Auditorium Carlo Sgorlon dal Pôl de Formazion da l’Universitât di Udin in Vie Margreth 3.
Vinars ai 12 di Avrîl a lis 5 e mieze dal dopomisdì a Palaç Belgrado in Place Patriarcjât a Udin, l’incuintri al sarà viert ai rapresentants des istituzions e a dute la citadinance par inviâ adun un dibatit su la cuestion in colaborazion cun ARLeF e Regjon.
Par finî, sabide ai 13 di Avrîl li de Biblioteche civiche Pre Gilberto Pressacco di Codroip, des 9 di matine presentazion dentri de XI Zornade de Scuele furlane, event dedicât a insegnants.
“No platìn – al dîs Federico Vicario, president de Filologjiche – che a son tantis preocupazions sul insegnament dal furlan a scuele, cun putrops istitûts comprensîfs ch’a fasin fadie a garantîlu ai students. Traviers cheste seconde edizion dal Dossier dal Centri Mercator su la lenghe furlane, o volìn tornâ a vierzi il confront su cheste tematiche centrâl pe difusion dal furlan”.
“Cence dismenteâ dopo – al zonte Daniele Sergon, president ACLiF – che l’insegnament de lenghe furlane al è leât a strent cul argoment da l’autonomie scolastiche: difat i istitûts che le garantissin a puedin derogâ dai numars minims di students par ples e sezions. Un argoment di rude atualitât cjalant al acorpament di diviers istitûts comprensîfs sul teritori regjonâl che intes ariis furlanofonis a podaressin invezit contâ sun chest dirit. Int discutarìn cul mont des istituzions, par cjatâ fûr percors comuns di valorizazion”.