LA CUNVIGNE DI JOIBE A UDIN
Une sale plene di int par scoltâ Mateo Taibon, ch’al contave dal “meracul” sucedût intes valadis ladinis dal Sud Tirol. Grant l’interès dal public ae cunvigne organizade joibe dopomisdì a Udin de Societât Filologjiche Furlane e de Assemblee de Comunitât Linguistiche Furlane, aleadis te bataie par incressi l’ativitât radiotelevisive publiche in Friûl.
Protagoniscj de cunvigne a son stâts il president dal ordin dai gjornaliscj dal Friûl Vignesie Julie Cristiano Degano e il gjornalist ladin Mateo Taibon. Degano al à ricuardât i aveniments storics ch’a àn puartât a fâ nassi lis trasmissions prin par sloven (la prime convenzion RAI a chest proposit e je dal 1992) e po dopo par furlan, scomençadis tal 2003 in gracie dal finanziament de Regjon: a jerin i timps di Alberto Lôf e de Pimpa. Taibon invezit al à contât de ativitât di RAI Ladinia: 100 oris anuâls di trasmission televisive, dôs edizions dal tg, une redazion autonome cun 10 gjornaliscj e fin 4 programiscj pai programs culturâi, cence fevelâ des trasmissions par radio. Ma i risultâts no son colâts dal piruçâr: «La strade e je stade lungje. Sul inprin al jere un grum di seticisim ancje di bande de popolazion ladine. La situazion di cumò e je il risultât di un lunc impegn durât desenis di agns, ch’e à puartât tal 1998 ai prins programs televisîfs regolârs par ladin e dîs agns daspò al prin tg par ladin».
Il confront cu la nestre regjon al è cuasi impietôs.
«Il Sud Tirôl al è par nô un model di buine pratiche – al à dit il president SFF Federico Vicario, ch’al à volût ancje meti in evidence il rûl dal setôr privât -. Jo o ringrazii lis tv e lis radio privadis ch’a contin dal nestri teritori e che lu fasin par furlan; ma cence nuie gjavâur, si à di dî che la RAI e je la RAI, l’emitente radiotelevisive di interès public».
«Il nestri sproc “plui furlan in RAI” – al à zontât il president ACLiF Daniele Sergon – nol è dome un dit. Al significhe in concret plui personâl in RAI ch’al fevele furlan e plui programs dedicâts al Friûl, cun ancje un telegjornâl par furlan». Ma Sergon al è lât ancje plui innà, visant di gnovis iniziativis istituzionâls: «O scrivarìn al Sotosegretari ae informazion e ae editorie Alberto Baracchini par cognossince ae Presidente dal Consei Giorgia Meloni, domandant di podê cjatâsi cun lui in chescj mês cussì impuartants pal rinovament de convenzion Stât-RAI, e pronts ancje a lâ jù a Rome cu la fasse tricolôr come Sindics furlans».
Su la cuestion al è intervignût ancje il gjornalist Daniele Lettig, ch’al ha let un comunicât comun dal comitât di redazion de RAI regjonâl e dai sindacât de sede RAI di Triest, dulà che i stes dipendents a mostrin lis prioritâts par un servizi plui adat ae realtât des minorancis linguistichis regjonâls.
Di ultin lis conclusions a son stadis tiradis dal President dal Consei regjonâl Mauro Bordin, ch’al è ametût che «e je ancjemò tante strade di fâ, ma il mont politic al è daûr a fâ la sô part. E dongje di nô a son lis aministrazions comunâls e lis associazions ch’a rapresentin dute la comunitât furlane».