UN FOCUS SU LA REALTÂT DAL SERVIZI PUBLIC PAI LADINS
L’esperience dai programs e dai telegjornâi da la RAI in lenghe ladine come prospetive par un
svilup simil da l’ufierte dal sisteme radiotelevisîf public ancje in lenghe furlane: a Udin joibe ai 14
di Març si fasarà il pont su la situazion des dôs minorancis inte cunvigne “RAI tal Friûl – Lis
prospetivis pe tutele intal servizi public radiotelevisîf” a Palaç Mantica (vie Manin 18) aes 5 e mieze
sot sere. Organizazion par cure di Societât Filologjiche Furlane (SFF) e Assemblee de comunitât
linguistiche furlane (ACLiF).
Dopo i salûts di jentrade di Federico Vicario, president SFF, e di Daniele Sergon, president
ACLiF, si larà dentri tal vîf dai lavôrs. Cristiano Degano, president dal Ordin dai Gjornaliscj dal
Friûl Vignesie Julie, al fevelarà di “RAI e minorancis linguistichis dal Friûl Vignesie Julie: un
percors ch’al partìs di lontan”. Mateo Taibon, gjonalist ladin, al contarà di “Programs e informazion
in lenghe ladine: l’esperience di RAI Ladinia”. Dopo la discussion lis conclusions a saran lassadis a
Mauro Bordin, president dal Consei Regjonâl dal Friûl Vignesie Julie.
“Cheste cunvigne – al conte il president Vicario – e nas de volontât di meti a confront la nestre
esperience cun chê di une altre lenghe minoritarie, une vore dongje dal furlan, ch’e à savût svilupâ
une programazion radiotelevisive di rilêf no dome sot l’aspiet de de tutele linguistiche, ma ancje
par ce ch’al rivuarde i contignûts. Aspiet, chel dai contignûts, di impuartance fondamentâl parcè
ch’al permet une plui grande e plui eficaç veicolazion de lenghe minoritarie. Cumò plui che mai e je
madure une autentiche sensibilitât inte popolazion e intes istituzions viers il ricognossiment e la
tutele, intune vision pluraliste, des minorancis storichis-linguistichis regjonâls, ch’a van tuteladis
ancje traviers l’informazion e la programazion radiotelevisive dade fûr dal servizi public”.
“RAI Ladinia – al zonte il president Sergon -, ch’e ufrìs i siei programs a une place di 30 mil
personis incirche che di chest moment a fevelin il ladin tes provinciis di Bolzan, Trent e Belun, e je
un perfet esempli dal fat che – ancje a front di numars no grancj – al è un dirit pes minorancis vê
une programazion di cualitât e cuantitât te proprie lenghe intai canâi publics. Un esempli di
programazion che o sperìn ch’al puedi zovâsi in curt ancje il teritori de marilenghe cun passe 600
mil personis che le fevelin e 145 Comuns aderents a l’ACLiF intes provinciis di Udin, Pordenon,
Gurize e citât metropolitane di Vignesie”.
Il program televisîf di RAI Ladinia, al è di stamp gjeneralist, cul telegjornâl TraiL (trasmetût su lis
frecuenzis di RAI 3bis) e cun documentaris e programs di informazion centrâts su lis valadis
ladinis. Il program radio in lenghe ladine al è ancje plui larc di chel televisîf: al fâs difat doi notiziaris
di lunis a sabide, la domenie dome une edizion, e programs di atualitât ducj i dîs de setemane. A
son ancje un sît web e une pagjine Facebook dedicade. In chest moment la programazion e je di
100 oris par an e l’organic al è fat di 10 gjornaliscj (ca di pôc a cressaran a 11), 4 programiscj e
diviers colaboradôrs. La sede centrâl e je a Bolzan.
Numars che la programazion par furlan in RAI e varès di rivâ a vê ancje daûr l’opinion dal mont
politic regjonâl: difat al 1n di Fevrâr e je stade aprovade a l’unanimitât di bande dal Consei
Regjonâl dal Friûl Vignesie Julie la mozion su lis convenzions jenfri Guvier e Rai intal merit de
promozion des trasmissions radiotelevisivis intes lenghis minoritariis, a scomençâ dal furlan.
Mozion che i conseis comunâi des 145 realtâts aderents a l’ACLiF in chescj dîs a son daûr a
condividi cuntun ordin dal dì.