LA RISPUESTE DA LA CEI A 141 COMUNS DA LA COMUNITÂT LINGUISTICHE FURLANE
Il gardenâl Matteo Zuppi, president da la Conference Episcopâl Taliane, al à rispuindût ai 141 Comuns aderents a l’Assemblee di Comunitât Linguistiche Furlane, che intai dîs passâts e veve pandût intune letare mandade juste a la CEI la contrarietât par la mancjade aprovazion dal Messâl in marilenghe. Une rispueste, chê dai vescui talians, ch’e lasse la puarte vierte in avignî par rivalutazions dal câs. Intal timp l’ACLiF e domandarà ai Comuns furlanofons di aprovâ une delibare di poie a la cause intai singui Conseis comunâi.
LA RISPUESTE DA LA CEI
“Zentîi Siôrs, intant graziis da la vuestre letare e da lis tantis e impuartantis considerazions che mi fasês rivâ. Il vescul Mazzocato (arcivescul di Udin, ndr), inta la Conference Episcopâl fate a Assisi intai ultins dîs, lis à rapresentadis cun une vore di passion e di competence. O cirarìn di studiâ la vuestre domande di cjatâ une strade par une soluzion ai vuestris sburts. Us ringrazii e o continuarìn a restâ in contat par che la strade aromai vierte za agns dal simpri cjâr Bonsignor Battisti (puar arcivescul di Udin mancjât intal 2012, ndr) no sedi bandonade”.
IL COMENT DA L’ACLiF
“O ringraziìn – al à dit Daniele Sergon, president da l’ACLiF e sindic di Caprive – il gardenâl Zuppi par la rispueste, segn di cemût che dentri da la Glesie catoliche taliane e je dut câs une atenzion vivarose par la cquestion tant da la lenghe furlane che di chês altris lenghis minoritariis. O ricuardìn difat che inta la votazion fate a Assisi la plui part dai vescui e veve aprovât il Messâl in marilenghe, ma il regolament da la CEI al previôt la maiorance cualificade e no chê semplice par chestis cuestions liturgjichis. In chest sens o crodìn ch’al sedi fondamentâl pai Comuns furlanofons esprimisi cuntune delibare dai lôr Conseis comunâi, come ch’al à za fat il Comun di Udin: une maniere par fâ sintî ancjemò di plui la nestre vôs di fedêi furlans, adun cun chês altris istituzions, Regjon prin di dut e ents e associazions furlanistis”.