PRESENTAZION GNÛF PROGRAM RADIO RAI
IN COLABORAZION CUN ACLIF
Presentade vuê ai 21 di Fevrâr a Udin, inta la sede da la Regjon Autonomer Friûl Vignesie Julie, la gnove trasmission radiofoniche Rai – cun relatîf podcast – intitolade “Friûl in Comun. Vôs e iniziativis dal teritori”. Un program in marilenghe, ch’al presentarà, puntade dopo puntade, i Comuns di lenghe furlane ch’a fasin part da l’ACLIF – Assemblee da la Comunitât Linguistiche Furlana (pal moment a son 144).
A presentâ il program il president da l’ACLIF Daniele Sergon, sindic di Caprive, adun cul diretôr da la sede Rai di Triest Guido Corso, la vice diretore nazionâl di Relazions Istituzionâls Rai Donatella Pace e a Mario Mirasola, responsabil di struture dai programs Rai di Triest. Presint ancje il president dal Consei regjonâl dal Friûl Vignesie Julie Mauro Bordin.
“Friûl in Comun. Vôs e iniziativis dal teritori” al sarà caraterizât di un ritmi svelt e ritmât, cun puntadis che – parsore da la schede tecniche dal Comun protagonist – a viodaran l’interviste ai sindics, schedis su peculiaritâts e events dal lûc, une testemoniance di cui che i vîf e i lavore (come par esempli esponents dal volontariât o curadôrs di progjets di particolâr interès) e a la fin une riflession su cemût che si dopre la lenghe furlane sul puest.
Il prin cicli di siet pontadis al sarà trasmetût di sabide ai 2 di Març a sabide ai 13 di Avrîl su RadioRaiUno, a scomençâ da lis 2 dal dopodimisdì, par un totâl di 20 minûts incirche a parom.
“Un prin pas – al à dit il president da l’ACLIF Sergon – viers une simpri plui largje presince da la marilenghe inta la programazion Rai. O sperìn che di chi e puedi inviâsi une gnove stagjon di programs fin a rivâ a une programazion informative gjornalistiche radiotelevisive cuotidiane in lenghe furlane, come ch’al sucêt intal rest di Italie par altris lengjis minoritariis tant che il ladin par esempli. In chest sens, fasint riferimento a la mozion bipartisan aprovade a l’unanimitât dal Consei regionâl dal Friûl Vignesie Julie il prin di Fevrâr par l’istituzion di une comission paritetiche jenfri Stât e Regjon sul contrat di convenzion cu la Rai par la lenghe furlane, o larìn cumò a domandâ a ducj i nestris Comuns aderents di aprovâ un ordin dal dì, sul stamp di chel aprovât za di cualchi Comun tant che Tumieç, par esempli, e soredut a supuart da la mozion regjonâl che si à dit. Darest il furtlan al è fevelât e capît ogni dì di passe 600 mil personis, cence contâ il grant bacin di coregjonâi ch’a vivin tal forest. Chest grup di citadins al à dirit di viodi ricognossude l’impuartance da la lôr lenghe inta la programazion radiotelevisive de l’emitent di Stât: graziis duncje a la sede Rai di Triest e al diretôr Corso par la sensibilitât dimostrade e par l’impegn spindût par fâ nassi “Friûl in Comun. Vôs e iniziativis dal teritori”. Par chest program la colaborazion da l’ACLIF e dai 144 Comuns aderents e je pronte e concrete e cussì al sarà ancje par dutis li iniziativis in avignî, che – o sperìn – a vegnaran metudis in pîts in curt par la marilenghe.”