UNE TIERE 4 LENGHIS: ACLIF E OSPITE LIS MINORANCIS LINGUISTICHIS DAL FVJ 

by | Zen 14, 2025

PAR UNE CUNVIGNE SU TUTELE E AVIGNÎDI FURLAN, TODESC E SLOVEN

Lis minorancis linguistichis dal Friûl Vignesie Julie (furlan, sloven e todesc) si tiraran sot a Spilimberc par une cunvigne che, a 25 agsn da la leç nazionâl che lis tutele, e fasarà il pont su difese e promozion di chestis fevelis, metintlis ancje a confront cun câs di sucès tant che chel dal ladin. Apontament ai 17 di Zenâr, zornade nazionâl da lis lenghis locâls, a lis 5 dal dopomisdì li dal Palaç di Sopra (Municipi) par l’incuinti “Une tiere 4 lenghis – passât presint avignî dal plurilinguisim in Friûl Vignesie Julie”. 

La citât dal mosaic e je stade sielte dai organizadôrs di ACLiF (Assemblee Comunitât Linguistiche Furlane, cun 150 Comuns aderents, cun ancje Spilimberc) e Istitût Ladin Furlan Pre Checo Placerean tant che pont ideâl di incuintri, su lis rivis dal flum Tiliment, da lis diviersis fevelis rejonâls, talian comprindût, a un cuart di secul da la promulgazion da la leç nazionâl 482/99. Un apontament in colaborazion cun Societât Filologjiche Furlane e Comun di Spilimberc e cu la poie da la Regjon Autonome Friûl Vignesie Julie e ARLeF. 

Parsore da la Assemblee dai Comuns di lenghe furlane, a saran ducj i plui alt rapresentants da lis istituzions e associazions slovenis dal FVJ, e e debutarà l’Assemblee da la Comunitât Linguistiche Todescje (ACLiT). Ospit speciâl il governadôr da la Comunitât ladine di Fassa Giuseppe Detomas.

“Cjatâsi cui amîs slovens e todescs – al dîs il sindic di Caprive Daniele Sergon, president da la ACLiF – a Spilimberc al sarà une ocasion impuartante par rindi simpri plui strent e zovevul il dialic scomençât di chescj mês. La consapevolece che la nestre specialitât e je fondade su la nestre pluriculturalitât e sul plurilinguisim, e à di rinfuarcîsi simpri di plui. La rêt e la sinergjìe jenfri lis realtâts istituzionâls e associazionistichis ch’a rapresentin lis trê lenghis minoritariis, che metudis adun a son maiorance inte nestre regjon, e à di jessi simpri plui fuarte, e il fat che a vedin acetât l’invît dutis lis plui grandis istituzions e associazions che indi valorizin l’identitât ancje linguistiche, e je par nô motîf di grande sodisfazion. Lis lenghis minoritariis sul teritori nazionâl tuteladis da la leç 482 a son simpri plui cussientis di jessi une vere ricjece culturâl, teritoriâl e che e à di jessi simpri plui nazionâl: come che di pôc o ai podût ricuardâ ancje in Val di Aoste a la “Zornade internazionâl da la montagne”. In chest sens il percors scomençât cui Ladins, bogns di meti adun lis fuarcis cui todescs dal Sud Tirôl – Alt Adige, al è pardabon significatîf. Cuntune popolazion vincj voltis mancul di chê furlane, a àn par esempli une sede Rai dedicade cun tant di telegjornâl par ladin. A Spilimberc, inta la capitâl dai mosaics, idealmentri o rapresentarìn la bielece dal mosaic da lis identitâts regjonâls, proponint ideis  costrutivis par l’avignî”.

A Spilimberc, a la presince da lis priincipâls autoritâts regjonâls, cun Sergon a fevelaran ancje Eros Cisilino president da la ARLeF, Federico Vicario president da la Societât Filologjiche Furlane, Geremia Gomboso president dal Istitût Ladin Furlan Pre Checo Placerean, Velia Plozner e rapresentarà la minorance todescje da la ACLiT, biel che par la minorance slovene a saran i trê presidents Dobrila Ksenija (SKGZ), Walter Bandelj (SSO) e Milos Cotar (ZSKP). Presints ancje Diego Navarria, prin president da la ACLiF a la sô costituzion dîs agns indaûr intal 2015, e il za nomenât governadôr da la Comunitât ladine di Fasse Giuseppe Detomas.